നമ്മളെത്തും മുന്നേ...

നമ്മളെത്തും മുന്നേ
ഒരു കാറ്റു വരും...
തണലുകളെ കൊഴിച്ചിടും...

തിരികെപ്പോരാനൊരുങ്ങുമ്പോ 
ഒരു കാറ്റു വീശും...
കൂടെയൊരു കുഞ്ഞാകാശം
പറന്നു വരും...
നമ്മളതിനെ
'കോട'യെന്നോ, മഞ്ഞെന്നോ വിളിക്കും...

അപ്പോഴുണ്ട്,

ആകാശത്തിനിടയ്ക്ക് കൂടി
ഒരു കുഞ്ഞു വെട്ടം വരും...
ജീവിതമാണെന്ന്,
ഒരിക്കലേയുള്ളെന്ന്,
ഒരു ശ്വാസത്തിനപ്പുറം തീർന്നു പോവുംന്ന്
ഓർമ്മപ്പെടുത്തും...

നമ്മുടെ പിണക്കങ്ങളെ,
സങ്കടങ്ങളെ,
മിണ്ടാതിരിക്കലുകളെ,
ഒച്ച കൂടലുകളെ...
പ്രണയമെന്നു തിരുത്തും....

നോക്കി നിൽക്കെ,
ലോകം ചുരുങ്ങിച്ചുരുങ്ങി
രണ്ടു പേരിലേക്കൊതുങ്ങും...!!!