Thursday, April 21, 2011

മറക്കാതിരിക്കുക

യൂദാസ്‌,
എനിക്കു നിന്നോട്‌ പകരം ചോദിക്കണം
കൂടെ നടന്നതിന്‌..
വീഴാതെ കാത്തതിന്‌...

യൂദാസ്‌,
മുപ്പതുവെള്ളി പോയിട്ട്‌
ഒരു വെള്ളിക്കാശു പോലും വിലയില്ലാതെ
ഓട്ടക്കാലണയ്ക്കു പോലും ലാഭമില്ലാതെ
നീെയെന്നെ ഒറ്റിയത്‌
എന്തിനായിരുന്നു എന്നല്ല,
ആര്‍ക്കു വേണ്ടിയായിരുന്നു.. ?

യൂദാസ്‌,
എനിക്കു നിന്നോട്‌ പകരം ചോദിക്കണം
എണ്റ്റെയീ ഉയിര്‍പ്പ്‌
നീ പ്രതീക്ഷിക്കാത്തതാകയാല്‍

ഞാന്‍ തന്നതു മുഴുവന്‍ തിരിച്ചെടുത്തു കൊണ്ട്‌
മരണത്തിണ്റ്റെ മൌനമായിരുന്നു കൊണ്ട്‌
എനിക്കു നിന്നോട്‌ പകരം ചോദിക്കണം

ഇനിയൊരു ക്രൂശിലേറ്റിന്‌
എനിക്കൊരു മരക്കുരിശൊരുങ്ങുമ്പോള്‍ ,
ഏതോ ആലയില്‍ ഇരുമ്പാണി തിളയ്ക്കുമ്പോള്‍
ഓര്‍ക്കുക,
ഒരു വെള്ളിക്കാശിനെങ്കിലും
മറക്കാതിരിക്കുക,
ഒന്നു ചിരിക്കാതിരിക്കാന്‍

അതെന്നെ കൊത്തി വലിക്കലാകും...

No comments:

Post a Comment